Welcome

የ'አዲስ:ዜና'ን መተግበሪያ ያውርዱ

የተሻለ የንባብ ተሞክሮ ለማግኘት እና የቅርብ ጊዜ ዜናዎችን ለማየት መተግበሪያውን ያውርዱ።!

Download
Cancel
Image:AddisZena
አዲስ ዜና | Addis Zena
ዲሽታ ጊና፡ "ኤኮን መጥቶ ሕዝቤንና ባህሌን ቢያይልኝ ደስ ይለኛል"

በድምጻዊ ታሪኩ ካንጋሲ የተቀነቀነው ዲሺታ ጊና ወይንም አዳም ወንድሜ የተሰኘው ነጠላ ዜማ በዩቲዩብ ከተለቀቀ ጊዜ ጀምሮ ከ19 ሚሊዮን በላይ ተመልካች አግኝቷል።

ሙዚቃው ለመጀመሪያ ጊዜ በዩቲዩብ ወደ አድማጮች የደረሰው ባለፈው ዓመት በሚያዚያ ወር ላይ ሲሆን አሜሪካዊው ድምጻዊ ኤኮን ሪሚክስ አድርጎታል።

ይህ በርካቶች በማሕበራዊ ሚዲያ የተቀባበሉት ሙዚቃን ኤኮን ሪሚክስ ለማድረግ የፈለገበትን ምክንያት ለአገር ውስጥ መገናኛ ብዙኀን በተናገረበት ወቅት ". . .ዲሽታ ጊና በአሁን ሰዓት በጣም ከወደድኳቸው ስራዎች መካከል አንዱ ነው. . ." ብሎ ነበር።

ኤኮን ስለሙዚቃው የተሰማውን በገለፀበት የቪዲዮ መልዕክት ". . .በግብርና ስራ እንደሚተዳደር ስሰማ ደግሞ ልቤ በጣም ተነካ። . . ." በማለት ከእርሱ ጋር ተጣምሮ ስራውን በመላው ዓለም ለማስተዋወቅ እንደሚፈልግ ገልጾ ነበር።

በትውልድ ሴኔጋላዊ በዜግነት አሜሪካዊ የሆነው ኤኮን በኡጋንዳ ወጣት ከያንያንን ለማበረታታት የተለያዩ ፕሮጀክቶችን ዘርግቶ እየሰራ ይገኛል።

የኤኮን ባለቤት ሮዚና፣ ባለቤቷ ከኢትዮጵያውያን ድምጻውያን ጋር ተጣምሮ እንዲሰራ ያላትን ፍላጎት በወቅቱ ገልጻ ነበር።

በኡጋንዳም በአገሪቱ የሙዚቃ ኢንደስትሪ ላይ የ12 ሚሊዮን ዶላር ኢንቨስትመንት እንደሚያደርጉ መረጃዎች ይጠቁማሉ።

ዲሽታ ጊና የተሰኘውን ሙዚቃ በምን ሁኔታ ውስጥ ሆኖ እንደጻፈው የተጠየቀው ታሪኩ፣ ወቅቱ የዲሽታ ጊና በዓል እየደረሰ እንደነበር አስታውሶ "ማታ ከብት ለመጠበቅ ወደ ጫካ ስሄድ የዚያን ሰዓት ነው የጻፍኩት" ብሏል።

ለአሪ ሕዝብ ዓመታዊ ክብረ በዓል በማሰብ ያዘጋጀው ይህ ሙዚቃ፣ በአገር እንዲሁም በዓለም አቀፍ ደረጃ ይወደዳል ብሎ አስቦ እንደማያውቅ አክሎ ተናግሯል።

"እኔ የራሴን ስሜት ነው የሰራሁት፤ ነገር ግን የሆነው ነገር፣ እየሆነ ያለውም ነገር ያስደንቀኛል" ሲል ስሜቱን ገልጿል።

በትውልድ ሴኔጋላዊ በዜግነት አሜሪካዊ የሆነው ኤኮን ሪሚክስ ያደረገው የድምፃዊ ታሪኩ ካንጊሲ (ዲሽታ ጊና) ሙዚቃ በአይ ቱዩን እና በስፖቲፋይ በኩል ለገበያ ቀርቧል።

ታሪኩ ድምጻዊ ኤኮንን ከዚህ በፊት ያውቀው እንደነበር ተጠይቆ "አይደለም ኤኮንን ኢትዮጵያዊት ናት የተባለችው ሚስቱን እንኳን አላውቅም ነበር" ሲሉ ለቢቢሲ ምላሹን ሰጥቷል።

ድምጻዊ ታሪኩ ከኤኮን ጋር በስልክ መገናኘታቸውን ገልጾ ወደፊት በአካል እንደሚገናኙ ቃል እንደገባለት ተናግሯል።

ኤኮን የሰራውን ስራ መውደዱን የሚናገረው ታሪኩ " መጥቼ አገርህን አያለሁ፤ እኔም ጋር ትመጣለህ አስጎበኝሃለሁ" በማለት ቃል እንደገባለት ይናገራል።

በምላሹም ታሪኩ ኤኮንን ወደ ጂንካ በመውሰድ ባህሉን ለማሳየት ምኞት እንዳለው ለቢቢሲ ገልጿል።

ኤኮን መጥቶ ሕዝቤን እና ባህሌን ቢያይልኝ እና ቢያውቅልኝ ደስ ይለኛል የሚለው ድምጻዊ ታሪኩ፣ በቀጣይ "በሌላ አካባቢ ያለ ተወዳጅ ባህሎችንም ለመስራት እፈልጋለሁ" ብሏል።

ሙዚቃው ሪሚክስ ሲደረግ የመጀመሪያውን ወጥ ስራ ይዘት እና መልዕክት ሳይለቅ እንዲሰራ ተነጋግረው እንደነበር ያስታወሰው ታሪኩ፤ በተሰራው ሥራም ደስተኛ መሆኑን ገልጿል።

እሱ ሙዚቃህን ሪሚክስ ካደረገ በኋላ የኤኮንን ስራ ማድመጥ አልጀመርክም? የቢቢሲ ጥያቄ ነበር።

"ከዩቲዩብ አውርጄ እያዳመጥኩ ነው፤ ደስ ይላል!" ብሏል።

ድምጻዊ ታሪኩ ካንጋሲ ይህንን ሙዚቃ ከሰራ በኋላ በደቡብ ኦሞ ዞን እንዲሁም በትውልድ ስፍራው አሪ፣ ከፍተኛ እውቅናን እንዳስገኘለት ይናገራል።

ቀጣይ ስራ በሚያስብበት ወቅት ከዚህ የበለጠ ስኬታማ ስራ መስራት እንደሚያስጨንቀው የሚናገረው ታሪኩ፣ ይህንኑ በማስመልከትም ለፈጣሪ እንደሚፀልይም ተናግሯል።

ድምጻዊ ታሪኩ ጋንካሲ የሚኖረው ጂንካ ሲሆን በግብርና ስራ ይተዳደራል።

በኢትዮጵያ መከላከያ ሠራዊት አባል በመሆንም በውትድርና አገልግሎ የሚያውቀው ታሪኩ ከዚህ በፊት "እምዬ ጂንካ" ሲል የተጫወተው ሙዚቃ አለው።

ኤኮን ወደ ዝና ማማ የመጣው ከራፐር ኤሚኒም ጋር በመጣመር በ2004 "ስማክ ዛት" የተሰኘውን ሙዚቃ ከሰራ በኋላ ነው።

ስራውን አድምጠው ከወደዱት በርካታ ግለሰቦች መካከል አትሌት ኃይሌ ገብረ ስላሴ 100 ሺህ ብር ሰጥቶታል።

ድምጻዊው ጠቅላይ ሚኒስትር ዐብይ አግኝተውት እንዳበረታቱት ከቢቢሲ ጋር በነበረው ቆይታ ወቅት ተናግሯል።

logoBBC rc198 cc0
Copyright © All rights reserved | Marvellous LLC