Welcome

የ'አዲስ:ዜና'ን መተግበሪያ ያውርዱ

የተሻለ የንባብ ተሞክሮ ለማግኘት እና የቅርብ ጊዜ ዜናዎችን ለማየት መተግበሪያውን ያውርዱ።!

Download
Cancel
Image:AddisZena
አዲስ ዜና | Addis Zena
የቻይናው አምባሳደር ከዩናይትድ ኪንግደም ፓርላማ ታገዱ

አምባሳደር ዚሄንግ ዜጉአንግ ሐምሌ 2013 የሹመት ደብዳቤያቸውን ለንግስ ኤልሳቤጥ II ባቀረቡበት ወቅት።

በዩናይትድ ኪንግደም የቻይና አምባሳደር የሆኑት ዚሄንግ ዜጉአንግ በዩናይትድ ኪንግደም ፓርላማ መገኘት እንደማይችሉ ተነገራቸው።

አምባሳደር ዚሄንግ ዜጉአንግ ዛሬ በቻይና ጉዳይ በሚመክረው የአገሪቱ ፓርላማ ለመገኘት አቅደው ነበር።

ይሁን እንጂ በዩኬ ፓርላማ አባላት ተቃውሞ የፓርላማ አፈ ጉባኤ ሰር ሎንደሳይ ሆለይ እና አፈ ጉባኤ ሎርድ ማክፎል የአምባሳደሩን እቅድ ውድቅ በማድረግ በፓርላማው መገኘት እንደማይችሉ አስታውቀዋል።

የቻይና ኤምባሲ በበኩሉ የሁለቱን አገራት ፍላጎት የሚጎዳ "አሳፋሪ እና የፈሪ ውሳኔ" ብሎታል።

ይህ የአምባሳደሩ እግድ የመጣው በቻይና እና በዩናይትድ ኪንግደም መንግሥታት መካከል ያለው ውጥረት ከፍ ባለበት ወቅት ነው።

ቻይና ባለፈው ዓመት ሕዳር ወር ላይ ስለ ቻይና ሐሰተኛ መረጃን ያሰራጫሉ ባለቻቸው አምስት የዩናይትድ ኪንግደም ፓርላማ አባላት ላይ የጉዞ እና የንብረት እግድ ጥላ ነበር።

ቻይና ይህን እርምጃ የወሰደችው ዩናይትድ ኪንግደም በቻይናዋ ዢንጂንግ ግዛት ይፈጸማሉ ባለቻቸው የሰብዓዊ መብት ጥሰቶች በቻይና ባለስልጣናት ላይ ማዕቀብ ከጣለች በኋላ ነበር።

ባለፈው ሳምንት በቻይና እግድ የተጣለባቸው አምስቱ የፓርላማ አባላት የቻይና አምባሳደር በፓርላማው መገኘት ላይ ያላቸውን ቅሬታ አስመልክተው ለፓርላማው አፈ ጉባኤ ደብዳቤ ጽፈው ነበር።

የፓርላማ አባላቱ ለአፈ ጉባኤው በጻፉት ደብዳቤ፤ የቻይና እግድ በፓርላማ አባላት ላይ ብቻ የተቃጣ ሳይሆን በሁሉም የፓርላማ አባላት እና በፓርላማው ላይ ያነጣጠረ ነው ብለዋል። የቻይናው አምባሳደር በፓርላማው እንዲገኙ መፍቀድ የቻይናን ውሳኔ እንደማጽደቅ ይቆጠራል ሲሉ የአምባሳደሩን በፓርላማው መገኘት አጥበቀው ተቃውመዋል።

የፓርላማው አፈ ጉባኤም የፓርላማ አባላቱን ጥያቄ በመቀበል አምባሳደሩ በፓርላማው እንዳይገኙ ወስነዋል።

የዩኬ ፎሬን፣ ኮመንዌልዝ እና ዲቨሎፕመንት ቢሮ ቃል አቀባይ በጉዳዩ ላይ በሰጡት አስተያየት፤ "ፓርላማ እራሱን የቻለ ተቋም ነው። ወደ ፓርላማው ማን መግባት እንዳለበት የሚወሰነው አፈ ጉባኤው ነው" ብለዋል።

በዩኬ የቻይና ኤምባሲ ቃል አቀባይ፤ "የጥቂት የዩኬ ፓርላማ አባላት አሳፋሪ እና የፈሪ ውሳኔ በቻይና እና በዩኬ መካከል ትብብር እንዳይኖር እክል ከመሆኑ በተጨማሪ የሁለቱ አገራት ሕዝብ የጋራ ፍላጎት የሚጎዳ ነው" ብለዋል።

logoBBC rc25 cc0
Copyright © All rights reserved | Marvellous LLC